'आनंदाच्या शेतातला' "कला मोहोर" हा अगदी वेगळा उपक्रम आहे.
"कलामोहोर... कलेचा आनंद, कलाकाराच्या सान्निध्यात!" या शब्दांतच या नव्या संकल्पनेचा अर्थ सामावलेला आहे.
आनंदाचं शेत म्हणजे पर्यटकांचं आवडतं फार्म ऑफ हॅपिनेस हे कोकणातलं कृषिपर्यटनासाठी प्रसिद्ध ठिकाण!
वसंत ऋतूत मोहोरानं फुललेल्या आंबा काजूच्या बागेत कलांचा मोहोरही फ़ुलावा हा "कलामोहोर" या संकल्पनेचा हेतू. 'कलामोहोर'च्या निमित्ताने, नामवंत कलाकारांबरोबर आनंदाच्या शेतात राहुन, त्यांच्या कलेचा आस्वाद घेण्याची संधी अनुभवता येणार आहे मोजक्या रसिक पर्यटकांना.
कल्पना करा, की तुम्ही एका नामवंत वादक, गायक, चित्रकार, शिल्पकार व्यक्तींबरोबर एकाच घरात, अंगणात, बागेत, शेतात वावरणार, उठणार बसणार आहात. त्या कलाकाराच्या सानिध्यात... गप्पा मारत, चहा कॉफी पिताना, त्यांच्याच तोंडून त्यांच्या कलेबद्दल, त्यांच्या कलाजगताबद्दल, गप्पा ऐकणार आहात! या कार्यक्रमाला ना स्टेज असेल ना निवेदक, ना साउंड सिस्टीम, ना स्पेशल लायटिंग! तुमच्यात आणि या मनस्वी कलाकारांत अंतर असणार आहे ते जेमतेम चार पाच फुटांचं. त्यानं आपल्या कलेचा जादुई पेटारा उघडावा आणि आपण लहान मुलांच्या कुतूहलानं त्याच्याभोवती कोंडाळ करून जमावं... मग त्याने प्रत्येकाच्या कुतुहलाला तोंड देता देता त्या पेटार्यातून एकेक चमत्कारी नमुना बाहेर काढून दाखवावा!
हा फॉर्मल कार्यक्रम नाहीच... ही असणार आहे एक आनंदाची मैफल, आनंदाच्या शेतातली!
"आनंदाचं शेत कृषी पर्यटन होम स्टे” अर्थात “Farm of Happiness” मधला या वर्षीचा म्हणजेच २०२५ चा 'कलामोहोर’ साजरा होत आहे आपल्या लाडक्या लेखिका, कवयित्री “डॉ. अरूणा ढेरे” यांच्या बरोबर.
कृष्णकिनारा, सीतेची गोष्ट, कवितेच्या शोधात… यांसारख्या आपल्या आवडत्या कथा-कविता संग्रह, कादंबरी, पुस्तकांच्या लेखिका, कवयित्री अरूणा ढेरे. ९२व्या अखिल भारतीय मराठी साहित्य संमेलनाच्या अध्यक्षा डॉ. अरूणा ढेरे मराठी भाषेतील योगदान महान आहे. एक लेखक,विचारवंत, कवयित्री, अनुवादक, साहित्य संशोधक, व्याख्यात्या म्हणून त्यांनी भाषेला उच्च दर्जा प्राप्त करून दिला आहे.
अतिशय साक्षेपी आणि मनस्वी लेखन करून वाचकाला समृध्द करणाऱ्या या लेखिकेला आपण प्रत्यक्ष भेटू शकणार आहोत. "आनंदाचं शेत” या कृषी पर्यटन होमस्टे मधल्या यंदाच्या ‘कलामोहोरमध्ये’.
साहित्य एक कला आहे. अनुभव, विचार, मतं ,अभ्यास या सगळ्याची कलात्मक गुंफण साहित्याला कलेचं रूप देते. रंजनाबरोबर समाजाला एक शहाणीव देणारी शब्दसंपदा अरुणा ढेरे यांनी आपल्याला दिली आहे. भेटूया आणि आणि गप्पांमधून जाणून घेऊया त्यांचा हा साहित्यप्रवास. तीन दिवसांच्या त्यांच्या वैचारिक सहवासात, अतिशय अनौपचारिक देवाणघेवाणीतून हा आनंद पिकवूया....आनंदाच्या शेतात.
मशागत... पीक… नांगरणी बुध्दीची, विचारांची देखील असतेच की....!
साहित्यिक अरूणा ढेरे आणि त्यांच्या कलाप्रवासाविषयी जाणून घेण्याकरता काही लिंक्स् पुढे देत आहोत:
विकिपिडियावरील अरूणाताई ढेरे यांबद्दलच्या माहितीचे पान
अक्षरग्रंथच्या वेबसाईटवर उपलब्ध असलेली अरूणा ढेरे लिखित पुस्तकांची यादी
दुरदर्शन वरील 'प्रतिभा आणि प्रतिमा या कार्यक्रमात सादर झालेली अरूणा ढेरे यांची मुलाखत
महा एमटीबी या चॅनल वर प्रसारित झालेलं अनुराधा ताईंचं भाषण, "माझं पुस्तक, माझी भूमिका"
या तीन दिवसांत काय काय घडेल?
४ एप्रिल - (दिवस १) दुपारी ४:०० पासून पुढे
वाजल्यापासून पर्यटक पाहुण्यांचं आगमन, परिचय / ओळख पाळख, अनौपचारिक गप्पा होतील.
५ एप्रिल - (दिवस २)
सकाळ सत्र- लेखिका, कवयित्री अरूणा ढेरे आणि सर्व पाहुण्यांसोबत एकत्र शेत फेरफटका (आनंदाच्या शेताची ओळख) यातही अरूणाताईंशी गप्पा, कविता, विवेचन, प्रबोधन, अनुभव कथन जसं गप्पांमधून सहज उलगडेल तसं.
दुपार सत्र-
भोजन आणि विश्रामानंतर प्रश्नोत्तरं, गप्पा, होतील. सहज फुलतील तितक्या!
संध्याकाळ सत्र-
आनंदाच्या शेतात बाहेरच्या परिसरात फेरफटकासहज, जमेल, उमजेल इतकंच निसर्ग आणि पक्षी निरिक्षण आणि यातून आपसूक होतील त्या गप्पा, अरूणाताईंबरोबर साहित्य रसास्वाद, आपली सर्वांची त्यांच्याबरोबर प्रश्नोत्तरं
रात्रीचं सत्र-
रात्रीच्या चांदण्यात, घराच्या अंगणात अरूणाताईंचे विचार, अनुभव कथन आणि आपल्या सगळ्यांचा थोडा विचारी, समंजस श्रोतृ-जागर
६ एप्रिल - (दिवस ३)
सकाळ सत्र-
अरूणाताईंबरोबर आनंदाच्या शेतातल्या काजूच्या झाडाखाली काजू गोळा करता करता त्यांच्या कथा कवितांमधून समजून घेऊ भाषेचा गोडवा
दुपार सत्र-
भोजन आणि विश्रामानंतर प्रश्नोत्तरं, गप्पा, होतील. यातही अरूणाताईंशी विचारांची देवघेव, जीवनप्रवास आणि आठवणी
संध्याकाळ सत्र-
आनंदाच्या शेतात बाहेरच्या परिसरात फेरफटका आणि अरूणाताईंबरोबर दिलखुलास प्रश्नोत्तरं. आणि कलामोहोर २०२५चा अनौपचारिक समारोप.
७ एप्रिल - (दिवस ४)
सकाळी न्याहारी करून सगळ्यांनी एकमेकांचा निरोप घेऊन परतीच्या प्रवासाकरता निघणे.
आणि या सगळ्या अनुभवांच्या मध्ये मध्ये… तुम्हाला, अन्नभान देणाऱ्या शेतावर, निसर्गरम्य ठिकाणचा निवास आणि अस्सल मराठी, कोकणी ग्रामीण संस्कृतीतलं सुग्रास जेवण, न्याहारी मिळणार आहे, वेळोवेळी.
कलामोहोर २०२४
२०२४ मधल्या तिसऱ्या वर्षीच्या 'कलामोहोर’चा आमंत्रित कलाकार होता संगीतकार ‘कौशल इनामदार’.
सोशल मिडियावर फारसा बोलबाला करायची संधी सुद्धा न देता रसिक पर्यटकांनी आपापल्या जागा आधीच बुक करून टाकल्या. मुंबई, पुणे, औरंगाबाद पासून आलेल्या या संगीत प्रेमींना मिळाली तब्बल तीन दिवस-रात्र गप्पा गांण्यांची मेजवानी. फक्त संगीतासाठीच नाही तर संगीत विषयक खन, इतर अनेक विषयांवरचे ब्लॉग्स मधून आपले सजग विचार मांडणाऱ्या कौशलच्या तोंडून त्याच्या संगितिक प्रवासाचे ‘याचि देही, याचि डोळा’ श्रोते होण्याची ही अनुभूती. तब्बल तीन दिवसांच्या या पंचपक्वान्नांच्या मेजवानीला केवळ पंधरा वीस मिनिटांच्या तुटपुंज्या पत्रावळीवर मांडणं अशक्य आहे. पण तरीही एक छोटासा कोलार्ज व्हिडिओ बनवण्याची इच्छा आहे. लवकरच हा व्हिडिओ या पेजवर आणि आमच्या सोशल मिडिया पेजेसवर शेअर करू.
तोपर्यंत, या क्षणचित्रांचा आनंद घ्या!
कलामोहोर २०२३
२०२३ मधल्या दुसऱ्या वर्षीच्या 'कलामोहोर'च्या मध्ये आम्ही आमंत्रित केलं होतं, प्रख्यात शिल्पकार श्री भगवान रामपुरे यांना.
आणि त्यांच्याबरोबर आनंदाच्या शेतात राहुन, त्यांच्या कलेचा आस्वाद घेण्याची संधी अनुभवायला सहभागी झाले होते काही मोजके रसिक पर्यटक पाहुणे.
संगीत, नृत्य, वादन यांसारखी सादरीकरणाची नसलेली शिल्पकला! तरीही तीन दिवस रसिक पर्यटक पाहुण्यांना खिळवून ठेवण्याची अवघड गोष्ट साधली ते रामपुरे सरांसारळ्या कसबी, अनुभवी शिल्पकारानं दिलेल्या शिल्प सादरीकरणानं. त्यांच्याख्या कलाकाराच्या सान्निध्यात राहून,म्हणजे एकाच घरात, अंगणात, बागेत, शेतात त्याच्या बरोबर जो अनुभव या पाहुण्यांना मिळाला... तो व्हिडिओतून मांडणं केवळ अशक्य! पण तरीही हा छोटासा व्हिडिओ, 'कलामोहोर' सारख्या आगळ्या वेगळ्या पर्यटन संकल्पनेची अनुभूती देण्याचा प्रयत्न!
"कलामोहोर २०२५ उपक्रमाचे दर
(उपक्रमाचं चेक इन ४ एप्रिल संध्याकाळी ४:०० पासून - चेक आउट ७ एप्रिल सकाळी १०:०० पर्यंत)*:
व्यवस्था १
आनंदाच्या शेतातील आमच्या घरात कलामोहोर पाहुण्यांकरता एकूण ६ रूम्स असून त्यांपैकी एक आमंत्रित कलाकार पाहुण्याकरता राखीव असेल. बाकी ५ पैकी प्रत्येक रूममध्ये ४ व्यक्तींचा निवास (शेअरींग पद्धतीने) अपेक्षित आहे. प्रत्येक रूममध्ये एक डबलबेड आणि दोन सिंगल बेड (कॉट्स) असतील. प्रत्येक रूमला स्वतंत्र बाथरूम (इंग्लिश टॉयलेटसह) उपलब्ध आहे.
व्यवस्था २
व्यवस्था १ च्या ५ रूम्स मध्ये २० व्यक्तींचा निवास भरल्यास, अतिरिक्त ८ जणांच्या निवासाची सोय आनंदाच्या शेतापासून १५ मिनीटांच्या अंतरावर असलेल्या गावातील अन्य होम स्टेमध्ये केली जाईल. गावातील स्थानिक कुटुंबाच्या घरात व्यक्तीगणिक एक कॉट याप्रमाणेच व्यवस्था असेल. रात्री विश्रामाकरता या घरापर्यंत एकत्र सोडण्यासाठी आणि सकाळी आवरून पुन्हा आनंदाच्या शेतावर पोहोचण्याकरता सुमो गाडीची व्यवस्था केली जाईल.
बाकी न्याहारी, जेवण व्ययस्था आनंदाच्या शेतातच असेल.
एकूण कलामोहोर निवासाकरता प्रत्येक व्यक्तीसाठी दर रू. १३,०००/- आहे
यात समाविष्ट गोष्टी:
* २.५ दिवस आणि ३ रात्री निवास (४ एप्रिल २०२४ रोजी दुपारी ४ वाजता चेक-इन - ७ एप्रिल २०२४ रोजी सकाळी १० वाजता चेक-आउट)
* कलाकाराचा सहवास आणि त्याच्या कलेची सादरीकरणे.
* सकाळचा चहा / कॉफी
* चहा / कॉफीसह नाश्ता
* दुपारचे शाकाहारी जेवण
* संध्याकाळी चहा / कॉफी
* रात्रीचे शाकाहारी जेवण
महत्त्वाचे:
या उपक्रमात आनंदाच्या शेतातील ५ रूम्स आणि गावातील अधिकच्या निवास व्यवस्थेत रूम शेअरींग तत्वावर दिले जाईल. प्रत्येक रूम मध्ये ४ व्यक्तींचा समावेश असेल. आपण एकूण चार व्यक्तींसाठी एकत्र बुकिंग केल्यास आपल्याला एकत्र राहण्यास रूम दिली जाईल.
सहभागी होणाऱ्या प्रत्येकाला आमंत्रित कलाकाराच्या सादरीकरणांत, एकूण विषयात स्वारस्य असणे अनिवार्य आहे.
प्रत्येक व्यक्तीस संपूर्ण कालावधीसाठी बुकिंग करणे अनिवार्य आहे.
वयवर्ष १५ आणि त्याखालील व्यक्तीस या उपक्रमात प्रवेश देता येणार नाही.
आपला सहभाग नक्की करण्यासाठी 100% रक्कम आगाऊ भरणे आवश्यक आहे.
संपूर्ण परिसरात आणि मुक्कामादरम्यान धुम्रपान आणि अल्कोहोलयुक्त पेये घेण्यास सक्त मनाई आहे.
कलामोहोर 2024 साठी तुमचे आरक्षण रद्द झाल्यास. (कृपया लक्षात ठेवा की इतर वेळचे पर्यटन आरक्षण रद्द करण्याचे धोरण कलामोहोर अनुभवाच्या आरक्षणाकरता लागू होत नाहीत)
कलामोहोर पर्यटन आरक्षण रद्द करण्याचे धोरण याप्रमाणे आहे:
1. तुमच्या चेक-इनच्या तारखेच्या किमान 21 दिवस आधी, आमच्याकडे रद्दीकरणाची पुष्टी झाल्यास तुम्हाला तुमची संपूर्ण आगाऊ रक्कम परत मिळेल.
2. तुमच्या चेक-इनच्या तारखेच्या 21-15 दिवसांच्या आत रद्दीकरणाची पुष्टी झाल्यास तुमच्या एकूण देय रकमेपैकी 50% आमच्याद्वारे रद्दीकरण शुल्क म्हणून कापून घेऊन येईल आणि उर्वरित रक्कम परत केली जाईल.
3. तुमच्या चेक-इनच्या तारखेच्या 15-0 दिवसांच्या आत रद्दीकरणाची पुष्टी झाल्यास तुमच्या एकूण देय रकमेपैकी 100% आमच्याकडून रद्दीकरण शुल्क म्हणून आकारले जाईल.
+91 76207 75521
+91 76207 75521
/farmofhappiness
/farmofhappiness
